Holtasprettur og vorhátíð 2022
Á miðvikudaginn var haldinn Holtasprettur og kepptu bekkir sín á milli í margvíslegum þrautum með það að markmiði að standa uppi sem sigurvegari síns stigs. Veðrið lék við okkur og fór keppnin fram úti við í ár. Nemendur kepptu m.a. í spjótkasti, fótbolta, pútti, boðhlaupi, negla spýtu, stígvélakasti, jarðsprengjugöngu og langstökki úr rólu. Á yngsta stigi var það 4. bekkur sem stóð uppi sem sigurvegarar, á miðstigi var það 6. EHE og á unglingastigi 8. KMG. Við óskum þessum bekkjum innilega til hamingju með sigurinn, frábæra samvinnu og seiglu.
Á fimmtudaginn var haldin vorhátíð Holtaskóla við mikla gleði bæði nemenda og starfsmanna. Allir nemendur byrjuðu á því að hlaupa í Regnbogaskokkinu okkar þar sem Slökkviliðið mætti til þess að bleyta aðeins upp í nemendum á meðan hlaupið var ræst. Það voru ansi litskrúðugir nemendur sem komu svo í mark. Á skólalóðinni voru m.a. hoppukastalar, sápubraut, húllahringir, snúsnú, gagaball völlur, teygjutvist og 7. og 9. bekkur kepptu í brennibolta. Danskompaní kom og sýndi glæsileg dansatriði úr myndinni Encanto og Jón Jónsson tók svo við og hélt uppi fjörinu. Deginum lauk á að gæða sér á grilluðum pylsum og svala.
Við viljum þakka nemendum, foreldrum, starfsmönnum og öðrum þeim sem komu að því að gera þessa daga frábæra.